Caan saupi Iran nih ral ah serh cangmi Israel cu nizan ttihni ah khan Iran nih drones le missiles phunphun hmangin a kah. Atutan hi Iran nih dengteo in Israel a raltuknak hriam hmangin a tuk a voikhatnak bik a si.
Cun, Iran nih Israel le Israel lei a tangmi hna kha na kan kah ve a si cun hi nak fak deuh in kan cawlcang lai tiin ralrin an pek hna. Cucaah, buainak a tthan chinnak hnga lo a rannak in UN Security Council nih lakhruak tonpumhnak meeting auh colh.
Jerusalem le chaklei Israel kiangkam hrawnghrang cu mipi ralrin petu Siren thawng lawng te a thang, van lei zoh mizik ceu a zuang mi hmuh khawh a si mipi thinpang le thlalau in an um.
Atu tan hi Iran nih a voikhatnak bik dengteo in Israel a raltuknak hriam hmangin a kah hi cawn niruk ni April 13 ah khan a si.
An I rem lonak hi a sau ngaingai cang, kum tampi I hmu thiam loin an um cang nain Iran nih dengteo in Israel hi a kap bal lo nain Iran nih bomb thlaknak drones zaa leng Israel lei ah a rak thlah tiin Israel lei nih an chim.
Iran lei nih thawng an thlah nak ah cun an thil tuah mi a tlamtling khan in an chim, zaa ah sawmnga tluk nih an I tinhmi a khen tiin an chim.
Nain, Israel leiin chimphuannak nawl a ngei mi Daniel Hagari nih zatuak 99% cu kan kham khawh tiin a chim.
“Zahan zaan ah Iran nih Israel cu hriam ngan zathum leng hmangin a rak kah. Iran lei nih an rak thlah mi minung nunnak caah ral a si mi thil kha hriam khamtu technology hmangin kan si khawh chungin kham khawh kan I zuam. Israel ram chungah a tla hnga ding mi ral vialte chungah zatuak 99% cu kan kham dih khawh. Kan hlawh a tling ngaingai. Cun, Iran nih a rak thlah mi bomh le missiles pawl hi Irag le Yemen ram leiin an rak thlah mi an si nain Israel ramchungah a thla mi pakhat hmanh a um rih lo.”
Israel lei hoih in a rak zuangmi drones cheukhat cu kan thlak piak ve hna tiin United States lei nih an chim.
Zei ruangah dah Iran nih ruah lo piin Israel hriam ngan in a tuk ti si ahcun Iran ralbawi pahnih le other cozah riantuantu cheukhat kha aluancia April 1 ah khan Syria an tlawn lioah an thi, kha thil he pehtlaiin Israel kha Israel nih sual a phawt.
Asinain, Israel nih kha thil kongah pehtlaihnak ka ngei lo tiin a chim ve.
European Commission i an hruaitu Ursula Von Der Leyen nih cun atutan buainak hi cu fianternak tuah khawh lo mi thil a si tiin a chim.
Australia ramkomh cozah hruainak ah ngunkeng a si mi Jim Chalmers nih atutan thil a cangmi hi cu lungretheih ngaingai awk a si tiin ABC thawnglatu sinah a chim.
“Iran a thil tuahmi cu kan cohlang kho hrimhrim lo. Iran hi a pawngkam I a ummi ram pawl caah a biapi tuk mi a si. A pawngkam ram caah thil tha nganpi a chuahter kho tu zong a si i an caah ral ttihnung a chuahter kho tu zong a si. Thil hi that lei panh loin chiater lei a panh chin sual lai ti phan a um. Middle East ah thil a cangmi hi fah chin lonak ding a biapi tuk. Minung nunnak tam tuk a liam cang tikah atutan I a cang mi thil hi a zual chin sual lai ti phan awk ngaingai a si.”
Australia cozah nih a ram mi chungin Israel ah a um mi mipi hna kha khoika hmanh chuak lo dingin thawng a thanh hna.
Iran nih Israel zong ralrinnak a pek ve nain, a nih belte cu na ka tuk ve ahcun hi nak fak tein kan kah lai tiin ralrin a pek. Cun, Iran nih US zong ralrin a pek, na thlak ve a si ahcun na ralkap nih hmunhma an khuarnak ka kah chih lai a ti.
Israel cozah nih I runvennak hi pehzulh in kan kalpi rih lai tiah thawng a thanh.
April thla 14 ah thil a cang mi kong he pehtlaiin UN Security Council nih lakhruak tonpumhnak meeting a auh.
