क्रिकेट भिक्टोरियाको आर्थिक एवम् प्रशिक्षण सहयोगमा द हिमालयन क्लबले कार्यक्रमको आयोजना गरेको हो ।
यसै हप्ता बाट सुरु भएको प्रशिक्षण कार्यक्रममा ५४ जना बालबालिका सहभागी भएको आयोजक संस्था द हिमालयन क्लबले जानकारी दिएको छ ।
५ देखि ८ वर्ष उमेर समूहका बालबालिका सहभागी हुन सक्ने उक्त प्रशिक्षण कार्यक्रममा क्रिकेट खेलका नियम र खेल सम्बद्ध अन्य जानकारी विभिन्न गतिविधि मार्फत गराइने प्रशिक्षण कार्यक्रम संयोजक तारा गैरेले एस बि एस नेपाली सँगको कुराकानीमा बताएका छन् ।
“क्रिकेट अस्ट्रेलिया अन्तर्गतको जुनीयर लेबलको कार्यक्रम हो, हाम्रो समुदायका बालबालिकाहरू सङ्ख्या बढ्दै गर्दा उनीहरूलाई अस्ट्रेलियाको राष्ट्रिय खेल भएकाले,खेल प्रति चासो जगाउन र प्रोत्साहन गर्ने उद्देश्यले कार्यक्रम आयोजना गरिएको हो ”, उनले भने ।
६ हप्ता सम्म सञ्चालन हुने उक्त कार्यक्रम भिक्टोरियाको प्रेस्टोन स्थित टि डब्ल्यु ब्लेक पार्कमा प्रत्येक मङलबार साँझ ६ बजे देखि ७ बजे सम्म सञ्चालन हुने संयोजक गैरेले बताए ।
“क्रिकेटप्रति रुचि जगाउने उद्देश्यले स–साना समूह बनाएर विभिन्न गतिविधिबाट प्रशिक्षण गराउँछौ,क्रिकेट खेल्न तालिम गराउने भन्दा पनि रमाइलो तरिकाले, क्रिकेटका नियमहरू र खेलका सिप सिकाउने गरी कार्यक्रमको संरचना तैयार पारिएको छ”, उनले भने ।
Tara Gaire is a co-ordinator of junior cricket program in victoria Source: Supplied
हाल प्रशिक्षण कार्यक्रममा सहभागी हुन ६० बालबालिका दर्ता भएका छन् ।
कार्यक्रम प्रति अभिभावकहरूको रुचि निकै देखिएको संस्थाले बताएको छ ।
“टाढा टाढाका सर्ववबाट पनि अभिभावकहरू प्रशिक्षणमा सहभागी हुन दर्ता गराउनु भएको छ, त्यसले उत्साहित बनाएको छ ।” संयोजक गैरेले भने ।
द हिमालयन क्लबले बालबालिकाका लागि यस अघि पनि प्रशिक्षण कार्यक्रम सञ्चालन गरिसकेको छ । 
सहभागिताको आधारमा यो हाल सम्मकै सबैभन्दा ठुलो कार्यक्रम भएको क्लबले जानकारी गराएको छ ।
Childrens learning cricket at victoria. Source: Supplied
तालिममा हिमालयन क्लबका तर्फबाट हरि कँडेल,सुशील बस्नेत,केशव पन्त र निश्चल कँडेल सहभागी छन् भने क्रिकेट अस्ट्रेलियाका तर्फबाट वेबेन हुलेट र रोहील अख्तरले बालबालिकालाई खेल सम्बन्धी गतिविधि गराउनेछन् ।
कार्यक्रम सुरु भएको हक हप्ता मात्रै भएकाले मेलर्वनको उत्तरी सर्वव बस्ने बालबालिका तालिममा सहभागी हुन चाहे सम्पर्क गर्न पनि संयोजक तारा गैरे अनुरोध गरेका छन् ।
“आधिकारिक दर्ता समय त सकिइसकेको छ यद्यपि हामी सँग क्रिकेट बल र ब्याटहरू रहेकाले कार्यक्रममा सहभागी हुन चाहानेले सम्पर्क गर्न सक्नुहुन्छ ।”
उक्त प्रशिक्षण कार्यक्रमलाई उलवर्थस्ले प्रायोजन गरेको हो ।
अस्ट्रेलियाको पछिल्लो समाचार, नेपाली भाषामा - सुन्नको लागि यो लिंकमा हेर्नुहोस्: https://podfollow.com/sbs-nepali
