དེ་ཡང་ཕྱི་དྲོའི་མཛད་སྒོའི་སྐབས་སུ་ནང་པ་ལ་བརྒྱུད་དེ་བོད་མི་རྣམས་བཙན་བྱོལ་དུ་བྲོས་ཚུལ་ངོ་སྤྲོད་བྱེད་པའི་དངོས་བྱུང་གློག་བརྙན། བོད། གངས་རིའི་སྟེང་གི་དམར་གསོད། ཅེས་པ་གཟིགས་འབུལ་ཞུས་ཡོད།
སྐབས་དེར་དང་བླངས་བོད་དོན་ཞུ་གཏུག་ལས་འགུལ་ཚོགས་མི་ཡིན་པ་ཆབ་སྲིད་བཙོན་ཟུར་བློ་བཟང་ལུང་རྟོགས་ལགས་དང་། རིག་འཛིན་དབང་མོ་ལགས་གཉིས་ནས་རྒྱ་ནག་གི་བཙན་བཟུང་འོག་ནས་ཉེན་ཁ་ཆེན་པོའི་ངང་རི་ལུང་མང་པོ་བརྒལ་ནས་བྲོས་བྱོལ་དུ་ཡོང་བའི་ཉམས་མྱོང་གསུངས་ཡོད་པ་མ་ཟད། དེ་བཞིན་གནས་མཁར་གསར་བོད་རིགས་ཚོགས་པའི་ཚོགས་གཙོ་ཀླུ་འབུམ་ལགས་ནས་ཀྱང་དཔལ་འབྱོར་འདུ་འགོད་ལས་གཞི་དང་འབྲེལ་བའི་སྐོར་གསུང་བཤད་གནང་།
སྐབས་དེར་བོད་མི་གཞོན་སྐྱེས་ལས་འགུལ་བ་ཞིག་ནས་ཁོང་རྣམ་པའི་སྒེར་གྱི་ལོ་རྒྱུས་དེས་གློག་བརྙན་བལྟས་པའི་མྱོང་བ་གཏིང་ཟབ་ཏུ་བཏང་སོང་ཞེས་འགྲེལ་བརྗོད་གནང་ཡོད། དངོས་བྱུང་གློག་བརྙན་འདི་ནི་གཙོ་བོ་བོད་མི་བཙན་བྱོལ་དུ་བྲོས་ལམ་ནང་པ་ལ་རུ་བྱུང་བའི་དོན་རྐྱེན་སྐོར་ཡིན་པ་དང་། དེའི་ནང་བོད་མི་རྣམས་ནས་རྒྱ་ནག་གི་བཙན་དབང་འོག་ནས་ཐར་བའི་ཆེད་རང་གི་ཚེ་སྲོག་བློས་བཏང་ནས་བྲོས་བྲོལ་དུ་ཡོང་བའི་དཀའ་སྡུག་ཆེ་བའི་འགྲིམ་འགྲུལ་གསལ་སྟོན་བྱེད་ཀྱི་ཡོད།
འདུ་འཛོམས་ཐོག་མི་གྲངས་སུམ་ཅུ་ནས་བཞི་བཅུ་ཙམ་མཉམ་ཞུགས་གནང་ཡོད་པ་དང་། ཚོགས་བཅར་བ་རྣམས་ནས་དང་བླངས་བོད་དོན་ལས་འགུལ་ཚོགས་པའི་ལས་དོན་ཆེད་དུ་ཞལ་འདེབས་རྒྱ་མི་ཆུང་བ་གནང་ཡོད། ས་གནས་དེ་རུ་དང་བླངས་བོད་དོན་ཞུ་གཏུག་ལས་འགུལ་བ་རྣམས་ནས་ས་གནས་ཀྱི་ཚོགས་སྡེ་ཁག་དང་། ཚོང་ལས་སྡེ་ཚན། གཙུག་ལག་སློབ་གཉེར་ཁང་སོགས་སུ་ཞུ་གཏུག་ལས་འགུལ་གཞི་རྒྱ་ཆེ་རུ་གཏོང་འཆར་ཡོད་འདུག
