ད་ཐེངས་ཀྱི་ཨོ་རྩལ་འགྲན་ཚོགས་ཐོག་ཨོ་སི་ཁྲུ་ལི་ཡར་རྒྱལ་ཁ་ཆེན་པོ་ཐོབ་ནས། ཉེ་ཆར་རྩེད་འགྲན་པ་རྣམས་ཕྱིར་ཨོ་སི་ཁྲུ་ལི་ཡར་འབྱོར་སྐབས། ནང་མི་དང་གྲོགས་པོ་གྲོགས་མོ། མི་མང་། དེ་བཞིན་ཨོ་སི་ཁྲུ་ལི་ཡའི་སྲིད་བློན་བཅས་ནས་དགའ་སྤྲོ་ཆེན་པོས་བསུ་བ་ཞུས་ཡོད།
ཨོ་སི་ཁྲུ་ལི་རྒྱལ་ཁབ་ཀྱི་ཚབ་ཏུ་པེ་རི་སི་ཨོ་རྩལ་འགྲན་ཚོགས་ནང་ཞུགས་མཁན་ཨོ་སི་ཁྲུ་ལི་ཡའི་རྩེད་འགྲན་པ་ ༤༦༠ ལ་སིཌ་ནིང་གནམ་ཐང་དུ་མི་མང་ཚོས་ཁོང་ཚོར་དགའ་ཚོར་ཆེན་པོས་བསུ་བ་དང་། ཕེབས་བསུའི་མཛད་སྒོ་འཚོགས་ཡོད།
སྐབས་དེར་བུ་མོ་ཞིག་གིས་ནང་མི་ཞིག་གི་ངོས་ནས་འདི་འདྲའི་ཕེབས་བསུ་མཛད་སྒོ་འདི་མཐོང་དུས་སེམས་ལ་དགའ་ཚོར་ཆེན་པོ་བྱུང་སོང་ཞེས་དང་། ཡང་ཁོ་མོས་ཨོ་རྩལ་འགྲན་ཚོགས་ནང་མཉམ་ཞུགས་བྱེད་མཁན་རུ་ཁག་ཚང་མ་ལ་སྤོབས་པ་ཆེན་པོ་སྐྱེས་བྱུང་། ཁོང་ཚོས་ཧ་ལས་པ་དཀའ་ལས་བརྒྱབ་སོང་ལ་ད་ཆ་ཚང་མ་ཕྱིར་ནང་ལ་འབྱོར་བ་དེ་སེམས་པ་དེ་བས་དགའ་པོ་བྱུང་སོང་ཞེས་གསུངས་འདུག
ཡང་བུད་མེད་དེས་ང་ནི་གྷ་རེ་མོ་རེས་སི་ Grae Morris ཡི་ཨ་མ་ཡིན། ཁོང་ནི་རླུང་འདེད་གྲུ་ཆུང་གཏོང་མཁན་ཞིག་དང་ལོ་ན་ ༢༠ རེད། ཁོང་ལ་དངུལ་གྱི་རྟགས་མ་རག་འདུག འདི་ནི་ཁོང་ཨོ་རྩལ་འགྲན་ཚོགས་ལ་ཞུགས་པ་ཐེངས་མ་དང་པོ་དེ་རེད། ང་རང་ཁོང་ལ་སྤོབས་པ་ཆེན་པོ་སྐྱེས་བྱུང་ཞེས་བརྗོད་འདུག
རྩེད་མོ་ཁྲིད་སྟོན་པ་རེ་བྷེ་ཁ་རེ་ཕོན་ Rebecca Rippon ཡི་སྣེ་ཁྲིད་པའི་རྒྱལ་ཡོངས་བུད་མེད་ཆུ་རྩེད་སྤོ་ལོ་རུ་ཁག་ཨོ་གླིང་གི་བུད་མེད་ཅེས་པའི་རུ་ཁག་དེར་ཐེངས་འདིར་པེ་རི་སི་ཨོ་རྩལ་འགྲན་ཚོགས་ནང་དངུལ་གྱི་རྟགས་མ་རག་ཡོད་པ་རེད། སིཌ་ནིང་གནམ་ཐང་དུ་ཁོ་མོའི་ཚ་མོ་ཚོ་དང་ཁོང་ཚོའི་པཱ་ལགས་བཅས་ནས་ཕེབས་བསུ་བྱས་འདུག
ཁོང་ཚོས་ཐེངས་འདིར་ང་ཚོ་ཨོ་རྩལ་འགྲན་ཚོགས་ཀྱི་རྩེད་མོར་བལྟ་རྒྱུར་སྤྲོ་སྣང་ཆེན་པོ་བྱུང་བ་དང་། ལོ་ངོ་མང་པོ་རིང་གི་འབད་བརྩོན་གྱི་གྲུབ་འབྲས་ལ་བརྟེན་ནས་ཐེངས་འདིར་རྟགས་མ་རག་པའི་གྲུབ་འབྲས་དངོས་སུ་ཐོན་པ་རེད་ཅེས་བརྗོད་འདུག
ཚ་མོས་ང་ཚོས་ཁོ་མོ་མཐོང་དུས་ཧ་ཅང་དགའ་པོ་བྱུང་སོང་། ཁོང་གི་རྩེད་མོ་ཧ་ལས་པ་ཡག་པོ་རྩེས་སོང་ལ། དེས་ང་ཚོར་སྤོབས་པ་ཆེན་པོ་སྦྱིན་བྱུང་ཞེས་དང་། ཡང་ཚ་མོ་གཞན་དེས་ཁོང་ཚོའི་གྲུབ་འབྲས་དེས་ང་ཚོ་དངོས་གནས་སྤོབས་པ་ཆེན་པོ་སྐྱེས་བྱུང་ཞེས་བརྗོད་འདུག
ཚ་མོ་ཚོའི་པཱ་ལགས་དེས་འདི་ནི་ཁོང་ཚོའི་རེ་བའི་རྨི་ལམ་ཞིག་དང་དེ་ནི་ཁོང་ཚོ་རང་ཉིད་ཀྱི་འབད་བརྩོན་ལ་བརྟེན་ནས་ཐོབ་པའི་གྲུབ་འབྲས་ཤིག་རེད། དེ་ནི་ཧ་ཅང་ཡག་པོ་རེད། ང་ཚོ་ང་ཡི་སྲིང་མོ་རེ་བྷེ་ཁེ་ལ་སྤོབས་པ་ཆེན་པོ་སྐྱེས་བྱུང་། ཁོང་མོ་རྩེད་མོ་རུ་ཁག་དེའི་ཁྲིད་སྟོན་པ་ཞིག་རེད། ཁོང་ཚོས་འདས་པའི་ཟླ་བ་དྲུག་ནང་དཀའ་ལས་ཧ་ལས་པ་བརྒྱབ་ནས། ཕྱིར་ནང་ལ་ལོག་དུས་དངུལ་གྱི་རྟགས་མ་འཁྱེར་ནས་ཡོང་བ་རེད། ཚང་མ་ཁོང་མོ་དང་ཁོ་མོའི་རུ་ཁག་ལ་སྤོབས་པ་ཧ་ལས་པ་སྐྱེས་བྱུང་ཞེས་འགྲེལ་བརྗོད་གནང་འདུག
དེ་བཞིན་རྩེད་འགྲན་སྐབས་རྨས་སྐྱོན་ཕོག་པའི་བུ་མོ་མེ་ཤལ་ཇེ་ནེ་ཁེ་ Michelle Jenneke ལ་ཡང་ཕེབས་བསུ་ཞུས་ཡོད། ཁོ་མོར་གཟེངས་རྟགས་རག་མེད་ཀྱང་རྨས་སྐྱོན་ཕོག་ན་ཡང་ཁོ་མོའི་སྙིང་ཆེན་པོས་འབད་བརྩོན་བྱས་ཡོད།
ཁོ་མོས་རྒྱུག་མཆོང་རྩེད་འགྲན་ནང་ཐེངས་གསུམ་པ་སྐབས་འགྱེལ་ནས་རྨས་སྐྱོན་ཕོག་པ་རེད།
བུད་མེད་དེས་ཤཱེ་ལེ་ Shelly ལགས་ཨོ་རྩལ་རྩེད་འགྲན་གྱི་རྒྱུགས་ཤར་གློད་སྐབས་བློ་སྟོབས་ཆེན་པོ་གསལ་བཏོན་བྱས་སོང་། ཁོ་མོ་ས་ལ་འགྱེལ་ནས་རིལ་བ་དེ་སེམས་པ་སྐྱོ་དགོས་པ་ཞིག་རེད། ཡིན་ན་ཡང་ཁོ་མོ་ཡར་བསྐྱར་ཡར་ལངས་ནས་མཉམ་དུ་རྒྱུགས་ཐུབ་པ་བྱུང་སོང་། ང་ཚོས་རེ་བ་བརྒྱབ་པ་ནང་བཞིན་གང་ཐུབ་ཅི་ཐུབ་ཀྱིས་རྒྱུགས་ཤར་ཡག་པོ་གློད་སོང་། ང་ཚོ་ཁོ་མོར་དགའ་པོ་ཡོད་ལ་ཁོ་མོར་སྤོབས་པ་ཆེན་པོ་སྐྱེས་བྱུང་ཞེས་བརྗོད་འདུག
ཡང་སྐྱེས་པ་དེས། མོ་ནི་ཨོ་སི་ཁྲུ་ལི་ཡའི་མི་ཞིག་རེད། མོ་རང་ལྷུང་རྗེས་ཡར་ལངས་ནས་འགྲན་བསྡུར་མཇུག་སྒྲིལ་བ་རེད། རྨས་སྐྱོན་ཕོག་ཀྱང་ཡར་ལངས་ནས་རྒྱུགས་པ་རེད། དེ་ནས་མོ་རང་གིས་བྱེད་ཐུབ་པ་དེ་རེད་ཅེས་གསུངས་སོང་།
ཨོ་སི་ཁྲུ་ལི་ཡའི་སྲིད་བློན་ཨན་ཐོ་ནི་ཨལ་བྷ་ནི་སིས་ཨོ་སུ་ཁྲུ་ལི་ཡའི་ལུས་རྩལ་པ་རྣམས་ལ་འཚམས་འདྲི་དང་དགའ་བསུ་ཞུས་གནང་ཡོད་པ་རེད།
ཁོང་གིས་ལུས་རྩལ་པ་དེ་ཚོ་འདི་གར་གནམ་གྲུའི་ཐེམ་སྐས་ནས་མར་འབབ་སྐབས་མི་ཚང་མའི་སྐེ་ལ་རྟགས་མ་མེད་ཀྱང་ཁོང་ཚོ་རེ་རེ་བཞིན་ལ་གསེར་གྱི་ལྗིད་ཚད་ཀྱི་རིན་ཐང་ཡོད། ཁོང་ཚོ་མི་རེ་ངོ་རེས་ང་ཚོའི་རྒྱལ་ཁབ་ལ་སྤོབས་པ་དགུང་ལ་བཏེགས་ཡོད་ཅེས་གསུངས་འདུག
